M. MALMÎSANIJ
Îdarekaranê kemalîstan verêna îddîa kerd ke Serewedaritişê Kurdan yê 1925î, bi piştîdayîşê îngilizan teşkîl bîyo. Labelê hîna 1925 de, tayê selahîyetdaranê tirkan bi xo zî eşkera kerd ke na îddîa bêbinge û bêbinyat a, sexte ya. Mesela, parlamenteranê Erziromî ra General Ruştîyî, a serre vatbî ke nê hedîseyî de “engişta ecnebîyan” (ecnebi parmağı) çin a[1]. Selahîyetdaranê tirkan, dima zî nêşêya bi tu (hîç) belge bimusnê ke têkilîya îngilizan û Şêx Seîdî yan zî têkilîya îngilizan û nê serewedaritişî est a. Reyna zî bi na îddîaya bêbingeye propagandaya xo domnaye.
Nê demê peyênî de, Abdullah Öcalan çend qiseykerdiş û nuşteyanê xo de, newe ra na îddîa rê wayîr vejîya, mesela wina va: “Seyh Sait meselesinde (…) İngilizler Şeyh Sait’e ayaklan dedi, destek verdi.”[2] (Meseleya Şêx Seîdî de (…) îngilizan Şêx Seîdî ra va sere wedare, piştî daye ey.)
Öcalan hîna aver şî û no serewedaritiş sey sebebê qetlîamê kurdan zî musna. Seba nê serewedaritişî va: “İngilizler çıkardı. (…) Mustafa Kemal’in Kürtler üzerine katliam yaklaşımı başta yoktu. İsyan gelişince, Cumhuriyeti korumak adına aşırı üstüne gitti.”[3] (Îngilizan vet. … Reftarê Mustafa Kemalî verê qetlîamê kurdan ser o nêbî. Serewedaritiş ke bî, semedê pawitişê Cumhûrîyetî ra hedravîyarte şî înan ser.)
Merdimê ke derheqê gelekî kesan û keyeyanê (aîleyanê) kurdan de îddîayanê Öcalanî biwanîn, vînenê ke nê raştîye îfade nêkenê, nê ê îddîa yê ke ey goreyê hesabê xo yê a game pêardê. Seba ke na babete fehm biba ma tîya de çend nimûneyan nusenê.
Abdullah Öcalanî, verê aşmêke, qalê “Judenrat”anê wextê nazîyan û tayê keyeyanê kurdan kerd: “Judenratî est ê ke bi nameyê Komîteyê Cihudan (Yahudîyan), jenosîdê cihudan de rolê xo est o. Nê grûbî yan zî keyeyî, cihudan ra teşkîl bîyê, faşîstî û ê pîya kar kenê. Bi pîyakarkerdişî, seba ke emrê xo yan zî yê keyeyê xo 24 saetî derg bikê, cihudan şawenê odayanê gazan. Seba ke sîstemê qirkerdişî bixebitîyo, nê komîteyan rê îhtîyac[ê nazîyan] est o. Cihudan ra vanê ‘ma şima benê cayê banyoyî’ û înan xapênenê benê odayanê gazan [veşnenê]. (…) Ha to rê keyeyê ke vanê ‘ez ke est a ez a’ sey Berzanîyan, Bedirxanîyan, hetta tayê tornê Şêx Seîdî yê ke ey dima mendê û tayê tornê Seyîd Rizayî bîyê Judenratî. Seba ke keyeyê xo bixelisnîn kurdîtî îmha kenê.”[4]
Çîyê ke Öcalan tîya seba nê kurdan vano raşt nîyê, keso ke tarîxê nê keyeyan bizano yan zî înan bişinasno weş zano ke no falsîfîkasyon o, yew negeyo (îftîrayo) bê eslûfesl o.
Goreyê vatişê Öcalanî bi xo, Öcalan yew merdimo bêqusur o (“Kendime kesinlikle kusursuzum diyebilirim”)[5], hetta vano “eke ez nêba şar nêbeno” (“ben olmadan halk olmaz”)[6] labelê gama ke qalê lîderanê bînan -çi kurd çi xerîb- keno, înan bîqiymet keno, zaf rey heqaret keno. Mesela goreyê vatişê ey, lîderê Hindîstanî yo namedar Gandi “yew belengaz o”.[7] Ê Gandîyê ke vera kolonyalîstan mucadele kerdbî, rêberîya hereketê milî yê Hindîstanî kerdibî û bîbî lîderê Hindîstanî.
Öcalan na babete de lîderanê bînan ney labelê Mustafa Kemalî zaf teqdîr keno. Vano: “Benim bugüne kadar Atatürk’e karşı, Türk ulusu ve bayrağı aleyhine bir sözüm olmamıştır. (…) Atatürk’ün önderlik hususlarını takdir ettim. Bugüne kadar da kendime rehber olarak kabul edip uygulamaya çalıştım… Yakalandığımda da Türk bayrağına karşı saygımı öperek gösterdim.”[8](Hetanî ewro vera Ataturkî, eleyhê milet û beyraqa tirkan de yew vatişê mi çin bîyo. (…) Mi xususê rêberîya Ataturkî teqdîr kerdê. Hetanî ewro zî mi o xo rê sey rêber qebul kerd û cehd kerd ke ez tetbîq bika. Ez ke tepîşîyaya zî mi bi maçîkerdişî, beyraqa tirkan rê hurmetê xo musna.)
[1] Behçet Cemal, Şeyh Sait İsyanı, s. 52
[2] Abdullah Öcalan’ın Avukatlarıyla 02.05.2001 Tarihli Görüşme Notları. Ayrıca bak. Abdullah Öcalan, Sanat Edebiyat ve Kürt Aydınlanması, Çetin Yayınları, İstanbul, 2003, s. 270
[3] Abdullah Öcalan’ın Avukatlarıyla 01.09.2004 Tarihli Görüşme Notları.
[4] “Yahudi soykırımında rol oynayan Yahudi Komitesi diye tanımlanan Judenrate (Judenrat)’lar var. Bunlar faşistlerle iş birliği yapan Yahudilerden oluşmuş grup veya ailelerdir. İş birliği karşılığında kendilerinin veya ailelerinin ömrünü 24 saat uzatmak için Yahudileri gaz odalarına gönderiyorlar. Soykırım sisteminin işlemesi için bu komitelere ihtiyaç duyuyorlar. Yahudilere, “sizi banyoya götürüyoruz” diyerek kandırıp gaz odalarına götürüyorlar. (…) İşte en benim diyen aileler Barzaniler, Bedirxaniler, hatta Şeyh Sait’in geride kalan bazı torunları, Seyit Rıza’nın bazı torunları Judenratlaşmışlardır. Ailelerini kurtarmak için Kürtlüğü imhaya götürüyorlar.” (Abdullah Öcalan, “Rêber Apo’nun 12. PKK Kongresi’ne gönderdiği Perspektif”, Serxwebûn, Gulan 2025, s. 2-7)
[5] Abdullah Öcalan, PKK 5. Kongresi’ne Sunulan Politik Rapor, Weşanên Serxwebûn, Haziran 1995, s. 24-26
[6] Abdullah Öcalan, Sömürgeci Cumhuriyet Kirli ve Suçludur, Serxwebûn Yayınları, Almanya, 1996, s. 253
[7] “Gandi Allahın zavallısıdır.” Parti Önderliği [Abdullah Öcalan], Temmuz Çözümlemeleri ve Talimatları, cilt II, 1991, s. 96
[8] Öcalan’ın Ek ifadesi, 03.04.1999, Serbesti, İstanbul, no: 5, Ağustos-Eylül 1999, s. 62