Ma hêriş û îşxalê dewleta Tirkî ra vanê ney!

Ma hêriş û îşxalê dewleta Tirkî ra vanê ney!

Çend serrîyo ke Dewleta Tirkîya hîrê parçeyanê Kurdistanî de şerê îşxalkerî domnena. No şer şerêko meşrû nîyo û îşxalkerî sûcê vera merdimayî ya. Heto bîn ra no şer ne hûqûqî û ne zî qanûnî yo. No şer semedê çînekerdişê destvistişanê sîyasî yê kurdan o û semedê vernîgirewtişê têkoşînê azadî, xelasî û xoserîya Kurdistanî yo.

Rojhilatê Mîyanênî de serebût û bîyayîşê siyasî ke benê, tesîrê înan hereketa azadîya Kurdistanî ser o esto, serebûtî zaf lez qewîyenê. Hêrişê dewletanê îşxalkerdan û dişmenê azadiya Kurdistanî roj bi roj zêde benê.

Dewletê îşxalkerî yê ke Kurdistan de yê tena qismêkê Kurdistanî de ney, seranserê Kurdistanî de dişmenê hereketa azadî û destvistişanê şarê kurdî yê. Semedê vernîgirewtişê hereketa azadî ya neteweya kurd û astengkerdişê destvistişanê neteweyî pê heme hêzê xo xebate kenê, hemkarîya yewbînan kenê û mîyanê xo de peymanan îmza kenê.

Dewleta tirk, ke înkarkerdişê neteweya kurd û şaranê bînan ameya ronayene, ronayîşê xo ra hetanî ewro karê jenosîdal kena û Kurdan ser o siyasetê asîmîlasyonî ramnena. Coka zî nê armancê xo tena Bakurê Kurdistanî de ney, seranserê Kurdistanî de zî siyasetê îşxalkerî ramnena. Dewleta tirk hêrîşanê kovane  bena ser  Başûrê Kurdistanî û bi no qayde zî hûqûqê mîyanneteweyî binpay kena. Û nê  hêrîşê bi nê hawayî 30 serrîyo ke dewam kenê.

Dewleta tirk hertim Başurê Kurdistanî de estbîyayîşê PKK semedê hêrîşanê xo sey sebeb nişan daya û dana. La rastî wîna nîya. Rastî na ya ke Bakurê Kurdistanî de şero ke PKK vera Dewleta Tirkîya dana nêmendo, la dewleta tirk PKK sey bahane xebitnena û armancê aye o esasî îşxalkerdişê Başurê Kurdistanî, binpaykerdişê serwerîya Hukmatê Kurdistanî, çînekerdişê federasyonî û Başûrê Kurdistanî de astengkerdişê dewletbîyayîşê neteweya kurd o. Semedo ke biresa meqsetê xo yê leyminan, Başûrê Kurdistanî de cayanê eskerîyan awan kena. Hûmara cayanê eskerî yê dewleta tirkî Başûrê Kurdistanî de roj bi roj zêde benê. Aşkereyo ke PKK zî bi teşebûs, siyaset û çalakîyanê xo yê Başûrê Kurdistanî, bena sebebê nê siyasetê dewleta tirkî yê hêrîşkar û îşxalkerdî.

Dewleta tirk tena Başurê Kurdistanî de ney, Rojavayê Kurdistanî de zî siyasetê îşxalkerî  ramnena. Her roj bi bahaneyê YPG-PYD hêrîş bena ser herêmanê Kurdistanî êyê ke destê şarê herême de yê. Bi hetkarîya îslamîstanê ke şîdet esas gênê, demografyaya Rojavayê Kurdistanî bedinena (vurnena). Armancê dewleta tirkî yo esasî çînekerdişê destvistişanê kurdan, astengkerdişê awankerdişê korîdorê kurd yê Başûr û Rojavayê Kurdistanî yo.

Îşxalker tena dewleta tirk nîya. Dewleta Suriye zî îşxalkeranê Kurdistanî ra yew a û a zî sey îşxalkeranê bînan dişmenê azadiya Kurdistanî ya, dişmenê destvistişanê neteweya kurd a. Şer û pêrodayîşê peyênî ke bajarê Qamişlo de mabênê HSD, artêş û grûbanê çekdaran ê girêdayîşê dewleta Suriye de vejayê zî nê armancê dewleta Sûrîye aşkere keno. Cayê ke dewleta Suriye tede nîya, dewleta tirk hêrişê ci kena, cayê ke destê tirkiya de nîyê de hêrişê dewleta Suriye ci rê benê. Her di dewletî zî, semedo ke Amerîka û Rusya vengê xo nêkenê, ney ra îstîfade kenê û ci ra cesaret gênê ke şarê Kurdî rê hêrişan kenê.

 Gorê vîr û bawerîya ma kurdî eşkenê vernîya hêrîşanê dewletanê îşxalkeran bigîrê.

Seba nê armancî, sey partî û rexistinanê kurdistanî ( nameyê ma cêr de yo):

Ma hêzanê Kurdan yê Rojavayê Kurdistanî ra wazenê ke, vera îşxalkerîye, semedê vernîgirewtişê bedilnayîşê demografyaya Rojavayê Kurdistanî û bidestvistişê heqanê neteweyî pîya têbikoşîn bidê, prosesê caardişê yewitîya bingehê Mitabaqatê Dihokî ser o werê bêrê û mijdana pêameyîşê yewitîye bidê şarê Kurdî.

Ma Hukmatê Herêma Kurdistanî û hêzanê welatperweranê Başurê Kurdistanî ra zî wazenê ke vera hêrîş, siyasetê tehdîdî û îşxalkerîya dewleta tirkîya û Îranî vegê xo berz bikê, îtifaq û yewrêzîya mîyanê keyeyê xo zî xurtêr bikê. Wa bikê ke, raya pêroyî, bi taybetî dewletê Amerika, Rusya û Ewropa vengê xo vera hêrîşanê dewletanê îşxalkeran berz bikê û vernîya nê hêrişan bigîrê.

Man veng danê PKK ke, serweriya parlamento, serekîya hukmatî û hêzanê pêşmerge yê Herêma Kurdistanî rê hurmet nîşan bidê, bahane nêdê destê dewleta tirk ke Başûrê Kurdistanî rê hêriş biko û peyê xo ra dewleta Tirkîya kaş nêkê Başûrê welatê ma.

Ma heme hêzanê welatperweranê Kurdistanî ra wazenê ke, bingehê welatperwerî ser o, hemkarîya mende ronê ke ma bi hêzêr bieşke  vernîya siyasetê dewleta tirkî ya îşxalkere û hêrîşanê aye yê kovane bigîre.

03.05.2021

PAK, PDK-BAKUR, PÊLKURD, PSK, TEVGER